Kalittokai

((Originally extracted from master file ^KALI.OCP))
((Last updated on 2004 April 14th))

• {KALI 27-1} ītalil kuṟai kāṭṭātu aṟaṉ aṟintu oḻukiya
• {KALI 27-2} tītu ilāṉ celvam pōl tīm karai maram nanta
• {KALI 27-3} pētuṟu maṭa moḻi piṇai eḻil māṉ nōkkiṉ
• {KALI 27-4} mātarār muṟuval pōl maṇa mauval mukai ūḻppa
• {KALI 27-5} kātalar puṇarntavar katuppu pōl kaḻalkupu
• {KALI 27-6} tātoṭu um taḷiroṭu um taṇ aṟal takaipeṟa
• {KALI 27-7} pētaiyōṉ viṉai vāṅka pīṭu ilā aracaṉ nāṭṭu
• {KALI 27-8} ētilāṉ paṭai pōla iṟuttantatu iḷavēṉil
• {KALI 27-9} nilam pūtta mara micai nimirpu ālum kuyil eḷḷa
• {KALI 27-10} nalam pūtta niṟam cāya nammai ō maṟantaikka
• {KALI 27-11} kalam pūtta aṇiyavar kārikai makiḻ ceyya
• {KALI 27-12} pulam pūttu pukaḻpu āṉā kūṭal um uḷḷār kol
• {KALI 27-13} kal micai mayil āla kaṟaṅki ūr alar tūṟṟa
• {KALI 27-14} tol nalam naṉi cāya nammai ō maṟantaikka
• {KALI 27-15} oṉṉātār kaṭantu aṭūum uravu nīr mā koṉṟa
• {KALI 27-16} veṉ vēlāṉ kuṉṟiṉ mēl viḷaiyāṭṭu um virumpār kol
• {KALI 27-17} mai eḻil malar uṇ kaṇ maru ūṭṭi makiḻ koḷḷa
• {KALI 27-18} poyyiṉāl purivuṇṭa nammai ō maṟantaikka
• {KALI 27-19} taiiya makaḷir tam āyamōṭu amarntu āṭum
• {KALI 27-20} vaiyai vār uyar ekkar nukarcci um uḷḷār kol
• {KALI 27-21} eṉa āṅku
• {KALI 27-22} nōy mali neñcamōṭu iṉaiyal tōḻi
• {KALI 27-23} nām illā pulampu āyiṉ naṭukkam cey poḻutu āyiṉ
• {KALI 27-24} kāmavēḷ viḻavu āyiṉ kalaṅkuvaḷ peritu eṉa
• {KALI 27-25} ēmuṟu kaṭum tiṇ tēr kaṭavi
• {KALI 27-26} nām amar kātalar tuṇai tantār viraintu ē